Meta នឹងបញ្ចុះតម្លៃនៃការជាវប្រចាំខែរបស់ខ្លួននៅអឺរ៉ុបពី €9.99 (ប្រហែល $10.60 USD) មកត្រឹម €5.99 (ប្រហែល $6.35 USD) ក្នុងមួយខែសម្រាប់ការប្រើប្រាស់តាមវេបសាយ និងពី €12.99 (ប្រហែល $13.75 USD) មកត្រឹម €7.99 (ប្រហែល $8.50 USD) ក្នុងមួយខែសម្រាប់ការប្រើប្រាស់លើប្រព័ន្ធប្រតិបត្តិការ iOS និង Android។ គណនី Facebook ឬ Instagram បន្ថែមនីមួយៗនឹងមានតម្លៃ €4 (ប្រហែល $4.25 USD) ក្នុងមួយខែសម្រាប់ការប្រើប្រាស់តាមវេបសាយ និង €5 (ប្រហែល $5.30 USD) សម្រាប់ការប្រើប្រាស់លើទូរស័ព្ទចល័ត។

ក្រុមហ៊ុននេះបានបញ្ជាក់ថា ការផ្លាស់ប្តូរនេះគឺជាការឆ្លើយតបទៅនឹងសម្ពាធពីនិយ័តករសហភាពអឺរ៉ុប ដែលស្វែងរកការការពារភាពឯកជនកាន់តែខ្លាំងសម្រាប់អ្នកប្រើប្រាស់ ទោះបីជា Meta ជឿជាក់ថាការកែតម្រូវទាំងនេះលើសពីតម្រូវការផ្លូវច្បាប់ក៏ដោយ។

Meta បានសង្កត់ធ្ងន់ថា ការផ្សាយពាណិជ្ជកម្មដែលមានលក្ខណៈផ្ទាល់ខ្លួន (Personalized Ads) នៅតែមានសារៈសំខាន់ក្នុងការគាំទ្រសេវាកម្មឥតគិតថ្លៃដែលអ្នកប្រើប្រាស់រាប់លាននាក់កំពុងប្រើប្រាស់នៅលើវេទិការបស់ខ្លួន ដោយលើកឡើងថាការផ្សាយពាណិជ្ជកម្មដែលមានគោលដៅជាក់លាក់ជួយជំរុញកំណើនសេដ្ឋកិច្ច និងគាំទ្រការងារ។

នៅក្នុងអត្ថបទរបស់ Meta បានបញ្ជាក់ឡើងវិញនូវការប្តេជ្ញាចិត្តរបស់ខ្លួនចំពោះការផ្សាយពាណិជ្ជកម្មដែលមានលក្ខណៈផ្ទាល់ខ្លួន (Personalized Ads) ដែលជាមធ្យោបាយដើម្បីរក្សាសេវាកម្មឱ្យនៅតែអាចប្រើប្រាស់បានដោយឥតគិតថ្លៃ ដែលផ្តល់អត្ថប្រយោជន៍ដល់ទាំងអ្នកប្រើប្រាស់និងអាជីវកម្មនានា។

Meta ក៏មានគម្រោងបន្តធ្វើការជាមួយនិយ័តករដើម្បីតស៊ូមតិសម្រាប់ការអនុវត្តការផ្សាយពាណិជ្ជកម្មដែលមានលក្ខណៈផ្ទាល់ខ្លួន "ប្រកបដោយការទទួលខុសត្រូវ" ដោយមានគោលបំណងរក្សាតុល្យភាពរវាងភាពឯកជននៃទិន្នន័យ និងបទពិសោធន៍អ៊ីនធឺណិតដែលមានការគាំទ្រពីការផ្សាយពាណិជ្ជកម្មដែលអ្នកប្រើប្រាស់បានរំពឹងទុក។